521 පාබල බලසේනාව වෙතින් 2025 මාර්තු මස 15 දින එම බලසේනා මූලස්ථාන පරිශ්‍රයේදී රුධිර පරිත්‍යාග වැඩසටහනක් පැවැත්වීය.
සිවිල් ක්‍රියාකාරකමි
‘ක්ලීන් ශ්‍රී ලංකා’ වැඩසටහනට සමගාමීව 543 පාබල බලසේනාවේ බලසේනාධිපති කර්නල් එච්.එස්.ඩබ්ලිව්.කේ ගල්හේනගේ RWP RSP USP psc ගේ මඟපෙන්වීම මත එම බලසේනාව හා කොළඹ ශාන්ති ප්‍රජා සජීවිකරණ ආයතනය එක්ව තලෙයිමන්නාරම රජයේ දමිළ මිශ්‍ර පාසලේ සිසු සිසුවියන් වෙත මත්ද්‍රව්‍ය උවදුර පිළිබඳ දැනුවත් කිරීමේ වැඩසටහනක් සහ එම පාසලේ සිසු සිසුවියන් 100 දෙනෙකු වෙත පාසල් උපකරණ බෙදාදීමේ වැඩසටහනක් 2025 මාර්තු මස 14 දින පවත්වන ලදී.
221 පාබල බලසේනාවේ බලසේනාධිපතිගේ මඟපෙන්වීම මත එම බලසේනාවේ 15 වන සංවත්සර දිනයට සමගාමීව 2025 මාර්තු මස 12 දින බලසේනා මූලස්ථානයේදී ලේ දන්දීමේ වැඩසටහනක් ක්‍රියාත්මක කරන ලදී. මෙම වැඩසටහන සඳහා යුද්ධ හමුදා සාමාජිකයන් සහ පොලිස් නිලධාරින් ඇතුළු පරිත්‍යාගශීලීන් 61 දෙනෙකු ස්වේච්ඡාවෙන් ඉදිරිපත් වී සිය රුධිරය පරිත්‍යාග කළහ.
‘ක්ලීන් ශ්‍රී ලංකා’ වැඩසටහනේ තවත් එක් අදියරක් ලෙස 542 පාබල බලසේනාව වෙතින් 2025 මාර්තු මස 08 දින මන්නාරම නගර ශාලාවේදී සංස්කෘතික නර්තන තරඟාවලියක් පැවැත්වීය. ‘දමිළ සංස්කෘතික නර්තනයේ වටිනාකම්’ තේමාව ඔස්සේ පැවති මෙම වැඩසටහන ජනවාර්ගික හා සමාජීය වශයෙන් සමඟිය ප්‍රවර්ධනය කිරීම, පාසල් සිසු සිසුවියන්ගේ කුසලතා වැඩිදියුණු කිරීම සහ යුද්ධ හමුදාව හා මන්නාරම ප්‍රදේශවාසීන් අතර පවතින විශ්වාසය ශක්තිමත් කිරීමේ අරමුණින් ක්‍රියාත්මක කරන ලදී.
ශ්‍රී කවීශ්වර වේළුවනාරාම ශ්‍රී සුගත ධර්මෝදය දහම් පාසලේ ශිෂ්‍ය නායක නායිකාවන්ට නිල ලාංඡන පැළඳවීමේ උත්සවය 2025 මාර්තු මස 02 දින එම විහාරස්ථාන පරිශ්‍රයේදී පැවැත්විණි. එම දහම් පාසලේ ප්‍රධාන ආචාර්ය හිමිපාණන්ගේ ආරාධනයකට අනුව මෙම අවස්ථාව සඳහා ප්‍රධාන ආරාධිත අමුත්තා ලෙස 11 පාබල සේනාංකයේ සේනාංකාධිපති මේජර් ජෙනරල් කේ.ඒ.යූ කොඩිතුවක්කු RSP USP psc IG සහභාගි විය.
අයහපත් කාලගුණික තත්ත්වය හේතුවෙන් පොතුවිල්, පානම සහ නීලගිරිය ප්‍රදේශවල පැවති ගංවතුර තත්ත්වයන්ට ප්‍රතිචාර දක්වමින් 242 පාබල බලසේනාව සහ ඒ යටතේ ස්ථාපිත ඒකකයන් වෙතින් සහන සැලසීමේ සහ මුදවාගැනීමේ මෙහෙයුම් ක්‍රියාත්මක කරන ලදී.
‘ක්ලීන් ශ්‍රී ලංකා’ වැඩසටහනට සමගාමීව, යුද්ධ හමුදාධිපතිතුමන්ගේ උපදෙස් මත ආරක්‍ෂක සේනා ආඥාපති - යාපනය ගේ මඟපෙන්වීම හා 51 පාබල සේනාංකයේ සේනාංකාධිපතිතුමන්ගේ අධීක්‍ෂණය යටතේ 10 රෙජිමේන්තුව ශ්‍රී ලංකා කාලතුවක්කු හමුදාවේ භටපිරිස් විසින් 2025 පෙබරවාරි මස 28 දින මාතගල්, ශාන්ත ජෝෂප් විද්‍යාල පරිශ්‍රය පිරිසිදු කර පින්තාරු කිරීමේ වැඩසටහනක් ක්‍රියාත්මක කරන ලදී.
කන්දෙගෙදර සාරන්‍යා දමිළ විද්‍යාල පරිශ්‍රයේදී 2025 මාර්තු මස 03 දින ක්‍රියාත්මක කළ ‘ක්ලීන් ශ්‍රී ලංකා’ ව්‍යාපෘතිය සඳහා ශ්‍රම දායකත්වය ලබාදුන් 1 බලඇණිය ගැමුණු හේවා බලකායේ භටපිරිස් එම විද්‍යාල පරිශ්‍රය අසල නායයෑමකට ලක්වූ නිවසක සිරවී සිටි පුද්ගලයෙකු මුදවාගැනීමට කටයුතු කරන ලදී.
23 බලඇණිය ගැමුණු හේවා බලකායේ අණදෙන නිලධාරි මේජර් ඊ.ඒ එදිරිසිංහ RWP RSP psc ගේ අධීක්‍ෂණය මත එම ඒකකයේ භටපිරිස් විසින් කිලිනොච්චිය ප්‍රදේශයේ වෙසෙන අවශ්‍යතා සහිත පවුල් වෙනුවෙන් මෙට්ට 40 ක් සහ පොල් පැළ 40 ක් බෙදාදෙන ලදී. මාවනැල්ල ප්‍රදේශයේ වෙසෙන සුමේධ මොලිගමුව මහතාගේ අනුග්‍රාහකත්වය මත මෙම පරිත්‍යාග වැඩසටහන ක්‍රියාත්මක කෙරිණි.
‘ක්ලීන් ශ්‍රී ලංකා‘ වැඩසටහනට සමගාමීව ආරක්‍ෂක සේනා ආඥාපති - යාපනය මේජර් ජෙනරල් වයි.ඒ.බී.එම් යහම්පත් RWP RSP ndu psc ගේ මඟපෙන්වීම යටතේ, ආරක්‍ෂක සේනා මූලස්ථානය - යාපනය භටපිරිස් විසින් වෙරළබඩ ප්‍ර‍දේශය සහ මාර්ග පිරිසිදු කිරීමේ වැඩසටහනක් 2025 මාර්තු මස 01 දින සිදුකරනු ලැබූහ.