28th November 2023 09:39:02 Hours
දිවයින පුරා ස්ථාපිත කර ඇති ශ්‍රී ලංකා යුද්ධ හමුදා සේවා වනිතා ඒකකය වෙතින් පාලනය වන සියලුම ‘විරු කැකුළු’ පෙරපාසල්හි ගුරුභවතුන් වෙත කෘතවේදීත්වය පුදකිරීම සදහා නොවැම්බර් මස 25 දින මැනිං ටවුන් පෙරපාසල් පරිශ්‍රය වෙත ඔවුන් හට ආරාධනා කරනු ලැබීය.
ශ්‍රී ලංකා යුද්ධ හමුදා සේවා වනිතා ඒකකයේ සභාපතිනි ජානකී ලියනගේ මහත්මියගේ යෝජනාවකට අනුව ක්‍රියාත්මක කරනු ලැබූ මෙම වැඩසටහනේදි යුද්ධ හමුදා සාමාජිකයන්ගේ දරුවන්ගේ අභිවෘද්ධිය වෙනුවෙන් ඔවුන් ඉටුකරනු ලබන සේවාවන් ඇගයීමට හා පැසසුමට ලක්කරනු ලැබීය.
යුද්ධ හමුදා තූර්ය වාදක හා රංග කලා අධ්‍යක්‍ෂ මණ්ඩලය විසින් ඉදිරිපත් කළ සෞන්දර්යාත්මක අංගයන්ගෙන් වැඩසටහන ප්‍රබෝධමත් විය. උත්සවය සමාප්තිය සනිටුහන් කරමින් සියලුම ගුරු භවතුන් වෙනුවෙන් දිවා භෝජන සංග්‍රහයක් පැවැත්විණි.
මෙම අවස්ථාව සඳහා ශ්‍රී ලංකා යුද්ධ හමුදා සේවා වනිතා ඒකකයේ බ්‍රිගේඩියර් සම්බන්ධීකරණ නිලධාරි ඇතුළු එම ඒකකයේ ජ්‍යෙෂ්ඨ සාමාජිකාවන් රැසක් සහභාගී වූහ.
