කමාන්ඩෝ රෙජිමේන්තු පුහුණු පාඨමාලා අංක 51 ඊ, එෆ් සහ ජී සාර්ථකව හැදෑරූ කමාන්ඩෝ භටයින් ‘මෙරූන් හිස්වැසුම’ පැළඳ විසිරයයි

කමාන්ඩෝ රෙජිමේන්තු පුහුණු පාඨමාලා අංක 51 ඊ, එෆ් සහ ජී යටතේ ක්‍රියාන්විත උපායමාර්ගයන් පිළිබඳ විශිෂ්ඨ වු පුහුණුවක් හැදෑරු සුවිශේෂී වුත් හැකියාවන්ගෙන් සමන්විත වූ නිලධාරින් සහ සෙසුනිලයින්ගේ විසිරයාමේ පෙළපාලිය සෙනසුරාදා (13) දින කුඩාඔය කමාන්ඩෝ රෙජිමේන්තු පුහුණු පාසල් පරිශ්‍රයේදී පැවැත්විණි. කමාන්ඩෝ රෙජිමේන්තුවේ අධිපති මේජර් ජෙනරල් පී.ජී.පී.එස්. රත්නායක ආර්ඩබ්ලිව්පි ආර්එස්පී එන්ඩීසී ගේ ආරාධනයකට අනුව විශිෂ්ඨයින් අතර විශිෂ්ඨයින් ලෙස ශ්‍රී ලංකා යුද්ධ හමුදා කමාන්ඩෝ රෙජිමේන්තුවට එක්වූ කමාන්ඩෝ භටයින්ගේ විසිරයාමේ පෙළපාලියේ ප්‍රධාන ආරාධිත අමුත්තා ලෙස යුද්ධ හමුදාධිපති ලුතිනන් ජෙනරල් විකුම් ලියනගේ ආර්ඩබ්ලිව්පි ආර්එස්පී එන්ඩීයූ සහභාගී විය.

කමාන්ඩෝ රෙජිමේන්තු පුහුණු පාඨමාලා අංක 51 ඊ, එෆ් සහ ජී යටතේ සාර්ථකව පුහුණු පාඨමාලාව හැදෑරූ නිලධාරින් 03 දෙනෙක් සහ සෙසුනිලයින් 162 දෙනෙකු මෙහිදී විසිරගියහ.

මෙම අවස්ථාව සඳහා ප්‍රධාන ආරාධිත අමුත්තා ලෙස සහභාගි වූ යුද්ධ හමුදාධිපතිතුමන්, කමාන්ඩෝ රෙජිමේන්තුවේ අධිපතිතුමන් ඇතුළු ජ්‍යෙෂ්ඨ නිලධාරින් විසින් උණුසුම් අයුරින් පිළිගැනීමෙන් අනතුරුව උත්සවය ආරම්භ කෙරිණි. අනතුරුව සම්මාන පෙළපාලියේ අණදෙන නිලධාරිගේ ආරාධනයෙන් යුද්ධ හමුදාධිපතිතුමන් විසිරයන කමාන්ඩෝ භටයින්ගෙන් සැදුම්ලත් සම්මාන පෙළපාලිය නිරික්‍ෂණය කිරීමෙන් පසුව සම්මාන පෙළපාලියේ ගෞරවාචාරය එතුමන් වෙත පුදකළහ. පසුව, විසිරයන කමාන්ඩෝ සාමාජිකයන්ගේ දෙමවුපියන් ඔවුන් වෙත කමාන්ඩෝ ලාංඡනය පළඳවනු ලැබූ අතර යුද්ධ හමුදාධිපතිතුමන් ප්‍රමුඛ කමාන්ඩෝ රෙජිමේන්තුවේ අධිපතිතුමන් ඇතළු තවත් ජ්‍යෙෂ්ඨ නිලධාරින් කිහිපදෙනෙකු එක්ව කමාන්ඩෝ රෙජිමේන්තුව සමඟ එක්වු අභීත පුතණුවන්ට ‘මෙරූන් හිස්වැසුම’ පැළඳවූහ.

පාඨමාලාවේ විශිෂ්ඨ දක්‍ෂතා දැක්වූ නව කමාන්ඩෝ සාමාජිකයන් වෙත කුසලාන හා සහතිකපත් ප්‍රදානය කිරීමෙන් අනතුරුව විසිරයාමේ පෙළපාලිය ආමන්ත්‍රණය කරමින් යුද්ධ හමුදාධිපතිතුමන් විසිරයන කමාන්ඩෝ සාමාජිකයන් වෙත සිය සුබපැතුම් පිරිනැමීය.

විසිරයාමේ උත්සවය සමාප්තියේ, කමාන්ඩෝ රෙජිමේන්තු පුහුණු පාසල් පරිශ්‍රයේ පිහිටි පැරෂුට් පතිත කලාපයේදී කමාන්ඩෝ සාමාජිකයන් ඔවුන් සතු අසීමිත ශක්තිමත්භාවය, උපායමාර්ගික කුසලතාවයන් හා ප්‍රහාරක හැකියාවන් මනාව පිළිඹිබු කරමින් කමාන්ඩෝ රෙජිමේන්තුවේ සැඟවුණු වෙඩික්කරුවන්ගේ ඉලක්කගත කිරීම, ජීව වෙඩි තැබීම, කමාන්ඩෝ භටයින්ගේ සැබෑ ආත්ම ආරක්‍ෂක සටන් ක්‍රම, ත්‍රස්තවාදී ග්‍රහණයට හසුවූ ප්‍රාණ ඇපකරුවන් මුදාගැනීම, ත්‍රස්ත මර්ධන ක්‍රියාන්විත නිදසුන්, යුද සුනඛ (K9) සංදර්ශන සහ නිදහස් ආර පැරෂුට් සංදර්ශන ආදී අංග රැසක් ඉදිරිපත් කරමින් සහභාගිවුවන් මහත් විෂ්මයට පත්කළහ.

උත්සවය සමාප්තියේ යුද්ධ හමුදාධිපතිතුමන් පැරෂූට් පාඨමාලාව හැදෑරූ විදේශීය නිලධාරින් සමඟ සුහඳ පිළිසඳරක නිරතවිය.

කමාන්ඩෝ රෙජිමේන්තුව වෙතින් ඉදිකිරීමට යෝජිත ලිඩෝ ජම්ප් කලාපයේ ප්‍රථම පස් පිඩැල්ල කැපීම සඳහා එම රෙජිමේන්තු අධිපතිතුමන් විසින් යුද්ධ හමුදාධිපතිතුමන් වෙත ආරාධනා කරන ලදී.

කමාන්ඩෝ රෙජිමේන්තුවේ අධිපතිතුමන් සහ යුද්ධ හමුදාධිපතිතුමන් අතර විශේෂ සමරු තිළිණ හුවමාරුවක් සිදුකෙරිණි. මෙම සුවිශේෂී උත්සවයේ වැදගත්කම සනිටුහන් කරමින් යුද්ධ හමුදාධිපති ලුතිනන් ජෙනරල් විකුම් ලියනගේ ආර්ඩබ්ලිව්පි ආර්එස්පී එන්ඩීයූ කමාන්ඩෝ රෙජිමේන්තු පුහුණු පාසලේ විශේෂ අමුත්තන් සඳහා වූ පොතේ සමරු සටහනක් තැබීය.

පාඨමාලාව හැදෑරූ නව කමාන්ඩෝ සාමාජිකයන් අතරින් විශිෂ්ඨ දක්‍ෂතා දැක්වූ නිලධාරින් සහ සෙසුනිලයන් පහතින් දැක්වේ:

දක්‍ෂතම කමාන්ඩෝ භටයා - ලුතිනන් එස්.එම්.එල්.ඩී. කරුණාරත්න

හොඳම ශාරීරික යෝග්‍යතාවය හිමි සෙබලා - සාමාන්‍ය සෙබල අයි.පී.එම්.ඩී. ඉලන්දර

දක්‍ෂතම වෙඩික්කරු - සාමාන්‍ය සෙබල ආර්.කේ.එස්.ටී. ලක්‍ෂාන්