නිරෝධායන කටයුතු සම්පූර්ණ කළ තවත් පුද්ගලයින් 405 දෙනෙකු සිය නිවෙස් වෙත පිටව යයි

අද (26) දින උදෑසන වනවිට ශ්‍රී ලංකාවෙන් කොවිඩ් - 19 ආසාදිත පුද්ගලයින් 1,666 දෙනෙකු හඳුනාගෙන ඇත. එම පුද්ගලයින් අතරින් පුද්ගලයින් 10 දෙනෙකු විදේශගතව සිට මෙරටට පැමිණි ශ්‍රී ලාංකිකයින් වේ. ඉතිරි පුද්ගලයින් 1,656 දෙනා දේශීයව හඳුනාගත් ආසාදිතයින් ලෙස වාර්තා වේ. හඳුනාගත් ආසාදිතයින් අතරින් වැඩිම ආසාදිතයින් පිරිසක් කොළඹ දිස්ත්‍රික්කයෙන් වාර්තා වන අතර, ඒ ආසාදිතයින් 360 ක් ලෙසය. ඊට අමතරව, ගම්පහ දිස්ත්‍රික්කයෙන් ආසාදිතයින් 256 ක් සහ ගාල්ල දිස්ත්‍රික්කයෙන් ආසාදිතයින් 172 ක් වාර්තා වේ. අනෙක් ආසාදිතයින් 868 දෙනා දිවයිනේ සෙසු දිස්ත්‍රික්ක වලින් වාර්තා වන බව කොවිඩ් - 19 පැතිරීම වැළැක්වීමේ ජාතික ක්‍රියාන්විත මධ්‍යස්ථානය සඳහන් කරයි.

අද (26) දින උදෑසන වනවිට, ශ්‍රී ලංකාව තුළ කොවිඩ්-19 වෛරසය ආසාදනය වු සම්පුර්ණ ආසාදිතයින් සංඛ්‍යාව 296,515 ක් ලෙස වාර්තා වේ. ඒ අතරින් අළුත් අවුරුදු සමයෙන් පසු වාර්තා වූ ආසාදිතයින් සංඛ්‍යාව 187,183 වේ.

අද (26) දින උදෑසන 0600 වනවිට (පසුගිය පැය 24 තුළ) රෝහල් සහ අතරමැදි ප්‍රතිකාර මධ්‍යස්ථාන තුළින් පුද්ගලයින් 937 ක් පූර්ණ සුවය ලබා පිටව ගොස් ඇත.

අද (26) දිනයේදී ත්‍රිවිධ හමුදාව සහ හෝටල් තුළ පවත්වාගෙන යනු ලබන නිරෝධායන මධ්‍යස්ථාන 64 ක් තුළ පුද්ගලයින් 3,655 දෙනෙකු නිරෝධායනය වෙමින් සිටියි. එසේම, අද (26) දින උදෑසන 0600 වනවිට (පසුගිය පැය 24 තුළ) නිරෝධායන මධ්‍යස්ථාන 10 ක් තුළින් පුද්ගලයින් 405 දෙනෙකු නිරෝධායන ක්‍රියාවලිය අවසන් කර නිවෙස් වෙත පිටව ගොස් ඇත.

ජුලි මස (24) වන දින ශ්‍රී ලංකාව තුළින් කොවිඩ්-19 වෛරසය ආසාදිත කාන්තා මරණ 22 ක් සහ පිරිමි මරණ 23 ක් ඇතුලුව මරණ 45 ක් වාර්තා වී ඇත.

අද (26) දින උදෑසන සිට කෑගල්ල දිස්ත්‍රික්කයේ කෑගල්ල පොලිස් බලප්‍රදේශයේ මලවිට ග්‍රාම නිලධාරි වසමේ ගෝලින්දවත්ත, රත්නපුර දිස්ත්‍රික්කයේ අයගම පොලිස් බලප්‍රදේශයේ පරගල ග්‍රාම නිලධාරි වසම, ගාල්ල දිස්ත්‍රික්කයේ ඇල්පිටිය පොලිස් බලප්‍රදේශයේ පරණකොළණිය ග්‍රාම නිලධාරි වසමේ දිවිතුරුවත්ත, මුලතිව් දිස්ත්‍රික්කයේ නයාරු පොලිස් බලප්‍රදේශයේ චෙන්මලේ නැගෙනහිර ධීවර කොටස සහ මොණරාගල දිස්ත්‍රික්කයේ මොණරාගල පොලිස් බලප්‍රදේශයේ කිවුලහිඳ ග්‍රාම නිලධාරි වසමේ නක්කලවත්ත හා මිල්ලකැලේවත්ත හුදකලාභාවයෙන් ඉවත් කර ඇත.