යුද්ධ හමුදාධිපතිතුමන් ශ්‍රී ලංකා යුද්ධ හමුදා පොලිස් හේවා බලකා රෙජිමේන්තු මධ්‍යස්ථානයේ නිල සංචාරයක නිරත වෙයි

යුද්ධ හමුදාධිපති ලුතිනන් ජෙනරල් ලසන්ත රොද්‍රිගෝ RSP ctf-ndu psc IG 2026 පෙබරවාරි මස 26 දින ශ්‍රී ලංකා යුද්ධ හමුදා පොලිස් හේවා බලකා රෙජිමේන්තු මධ්‍යස්ථානයේ නිල සංචාරයක නිරත විය.

යුද්ධ හමුදාධිපතිතුමන් රෙජිමේන්තු මධ්‍යස්ථානය වෙත පැමිණි අවස්ථාවේදී, මේජර් ජෙනරල් බී.ජී.එස්. ප්‍රනාන්දු USP Hdmc psc සහ රෙජිමේන්තුවේ ජ්‍යෙෂ්ඨ නිලධාරීන් විසින් උණුසුම් අයුරින් පිළිගන්නා ලදී. අනතුරුව භටපිරිස් විසින් යුද්ධ හමුදාධිපතිතුමන් වෙත කඳවුරු මුරයේ ගෞරවාචාරය පිරිනමන ලදී. ඉන් පසුව, සරඹ පිටියේදී පිරිනමන ලද යුද්ධ හමුදාධිපති සම්මාන මුරය නිරීක්ෂණය කරන ලදී.

මෙම සංචාරය අතරතුරදී, යුද්ධ හමුදාධිපතිතුමන් විසින් රෙජිමේන්තු මධ්‍යස්ථානයේ අලුතින් ඉදිකරන ලද චෝදනා ගාර ගොඩනැගිලි සංකීර්ණය විවෘත කරන ලද අතර, අනතුරුව භටපිරිස් ඇමතීමට ද එක් විය. මෙම අවස්ථාව සඳහා ජ්‍යෙෂ්ඨ නිලධාරීන්, නිලධාරීන් සහ සෙසු නිලයන් විශාල පිරිසක් සහභාගී වූහ.

මෙම උත්සවය අතරතුරදී, ශාරීරික පුහුණු උපදේශක පාඨමාලා අංක 135 යටතේ කාන්තා ප්‍රථම ස්ථානය හා සමස්ත පාඨමාලාවේ 11 වන ස්ථානය හිමිකරගත්, ශ්‍රී ලංකා යුද්ධ හමුදා පොලිස් හේවා බලකායේ ලාන්ස් කෝප්‍රල් එස්.ඩී. මැණික් අතුල වෙත යුද්ධ හමුදාධිපතිතුමන් විසින් දිරිගැන්වීමේ මූල්‍ය පරිත්‍යාගයක් සිදු කරන ලදී.