යුද්ධ හමුදා අන්තර් රෙජිමේන්තු ජූඩෝ තරඟාවලිය - 2025 සාර්ථකව අවසන්

ශ්‍රී ලංකා යුද්ධ හමුදා අන්තර් රෙජිමේන්තු ජූඩෝ තරඟාවලිය - 2025 පනාගොඩ ගෘහස්ථ ක්‍රීඩාංගණයේදී 2025 නොවැම්බර් මස 03, 04, 05 සහ 06 යන දිනයන්හිදී පැවැත්විණි. තරඟාවලියේ අවසන් දින ප්‍රධාන ආරාධිත අමුත්තා ලෙස ශ්‍රී ලංකා යුද්ධ හමුදා උපකරණ මාස්ටර් ජෙනරාල් සහ යුද්ධ හමුදා යුධෝපකරණ බලකායේ බලකාධිපති හා යුද්ධ හමුදා ජූඩෝ කමිටුවේ සභාපති මේජර් ජෙනරල් ඩබ්ලිව්.එම්.එස්.එන් විජේකෝන් ndc AATO සහභාගී විය.

මෙම තරඟාවලිය සඳහා යුද්ධ හමුදාවේ රෙජිමේන්තු 14 ක් නියෝජනය කරමින් ක්‍රීඩක ක්‍රීඩිකාවන් 182 ක් සහභාගි වූහ. රන් පදක්කම් 05 ක්, රිදී පදක්කම් 04 ක් සහ ලෝකඩ පදක්කම් 04 ක් දිනා ගනිමින් ශ්‍රී ලංකා ජාතික ආරක්‍ෂක බලමුළු කණ්ඩායම සමස්ත පිරිමි ශූරතාවය හිමිකර ගත්හ.

පිරිමි අනුශූරතාවය ගජබා රෙජිමේන්තුව විසින් හිමි කර ගත් අතර, දෙවන අනුශූරතාවය යුද්ධ හමුදා යුධෝපකරණ බලකාය විසින් හිමිකර ගන්නා ලදී. රන් පදක්කම් 07ක්, රිදී පදක්කම් 08ක් සහ ලෝකඩ පදක්කම් 01ක් දිනා ගනිමින් යුද්ධ හමුදා කාන්තා බලකාය සමස්ත කාන්තා ශූරතාවය හිමිකර ගත්හ.

කාන්තා අනුශූරතාවය ශ්‍රී ලංකා ඉංජිනේරු බලකාය විසින් දිනා ගන්නා ලද අතර, දෙවන අනුශූරතාවය යුද්ධ හමුදා යුධෝපකරණ බලකාය විසින් හිමිකර ගන්නා ලදී. ආධුනික ජූඩෝ තරඟාවලියේ පිරිමි ශූරතාවය ශ්‍රී ලංකා සිංහ රෙජිමේන්තුව විසින් හිමි කර ගත් අතර, යුද්ධ හමුදා යුධෝපකරණ බලකාය සහ ගජබා රෙජිමේන්තුව සම අනුශූරතාවය හිමිකර ගන්නා ලදී.