2nd August 2025
ශ්‍රී ලංකා යුද්ධ හමුදාව වෙතින් රණක්‍ෂිතයට පත්ව සිටින සහ විශ්‍රාමික යුද්ධ හමුදා සාමාජිකයන් වෙනුවෙන් 2025 ජනවාරි මස 20 වන දින සිට දිවයින පුරා වෛද්‍ය කඳවුරු පැවැත්වීය. අතිගරු ජනාධිපති සහ සන්නද්ධ හමුදා සේනාධිනායක අනුර කුමාර දිසානායක මැතිතුමන්ගේ මඟපෙන්වීම මත ක්‍රියාත්මක වන ‘ක්ලීන් ශ්‍රී ලංකා’ වැඩසටහනට සමගාමීව ගෞරවනීය හා සෞඛ්‍ය සම්පන්න සමාජයක් ගොඩනැඟීමේ මෙන්ම සෞඛ්‍ය සේවා ප්‍රවර්ධනය කිරීම සහ රණක්‍ෂිතයට පත් ප්‍රවීණයන්ගේ යහපැවැත්ම තහවුරු කිරීමේ අරමුණින් මෙම වෛද්‍ය කඳවුරු ක්‍රියාත්මක කෙරිණි.
මෙම වෛද්‍ය කඳවුරු සඳහා 10,000 කට අධික ප්‍රතිලාභීන් පිරිසක් සහභාගි වූ අතර, එහිදී වෛද්‍ය අභියෝගයන්ට මුහුණ පා සිටින රණවිරුවන්ගේ පවුල්වල සාමාජිකයන් සහ යුද්ධ හමුදා විශ්‍රාමික සාමාජිකයන් වෙනුවෙන් වෛද්‍ය ආධාර පිරිනැමිණි.
මෙම වෛද්‍ය කඳවුරු තුළින් වෛද්‍ය උපදේශන, චර්ම රෝග සහ දන්ත සායන, කෘත්‍රිම අවයව නඩත්තු සේවා, මානසික සෞඛ්‍ය උපදේශන සහ පෝෂණ මාර්ගෝපදේශ ඇතුළු වැඩසටහන් රාශියක් ක්‍රියාත්මක කෙරිණි.
