11th April 2026
විශ්රාමික යුද්ධ හමුදා සාමාජිකයන් සඳහා වන සේවාවන් ද ඇතුළත් කරමින් පුළුල් කරන ලද යුද්ධ හමුදා E-Portal ජනගත කිරීමේ උත්සවය, 2026 අප්රේල් මස 10 දින යුද්ධ හමුදා මූලස්ථානයේදී යුද්ධ හමුදාධිපති ලුතිනන් ජෙනරල් ලසන්ත රුද්රිගු RSP ctf-ndu psc IG ගේ ප්රධානත්වයෙන් පැවැත්විණි.
උත්සව අවස්ථාවට පැමිණි යුද්ධ හමුදාධිපතිතුමන්, ශ්රී ලංකා සංඥා බලකායේ බලකාධිපති මේජර් ජෙනරල් කේ.එම්.ජී. බණ්ඩාරනායක USP ndc psc සහ තොරතුරු තාක්ෂණ අධ්යක්ෂ බ්රිගේඩියර් එම්.ආර්. හමීම් USP විසින් උණුසුම් අයුරින් පිළිගනු ලැබීය.
අලුතින් හඳුන්වා දුන් මෙම ‘ප්රවීණයන්ගේ මොඩියුලය’ මගින් මූලික වශයෙන් 2022 ඔක්තෝබර් මාසයෙන් පසුව විශ්රාම ගත් පිරිස් වෙත සේවාවන් සපයනු ලබන අතර, පසුව එය ක්රමයෙන් සියලුම විශ්රාමික ප්රවීණයන් දක්වා ව්යාප්ත කිරීමට නියමිතය. මෙම මොඩියුලය හරහා මූල්ය වාර්තා, වෛද්ය ඉතිහාසය, සුබසාධන සේවා සහ නිල සන්නිවේදනයන් වෙත ප්රවේශ වීමේ පහසුව සලසා දී ඇත.
මෙම අවස්ථාව සඳහා යුද්ධ හමුදා මාණ්ඩලික ප්රධාන මේජර් ජෙනරල් වයි.ඒ.බී.එම්. යහම්පත් RWP RSP ndu psc, යුද්ධ හමුදා නියෝජ්ය මාණ්ඩලික ප්රධාන මේජර් ජෙනරල් කේ.වී.එන්.පී. ප්රේමරත්න RSP USP nps psc, රණවිරු සේවා හා පුනරුත්ථාපන අධ්යක්ෂ බ්රිගේඩියර් ආර්.ජී.එල්.කේ. වීරකෝන් RWP RSP, ජ්යෙෂ්ඨ නිලධාරින් සහ නිලධාරින් පිරිසක් සහභාගී වූහ.
